الوصايا العشر

٢- ما بعرف مين عم يبعتلنا هالرسائل، الرسائل يلي بيوصلها الساعي الكذاب عالبسكليت، قال جايبلنا رسالة من عند أخواتي، من أميركا البعيدة، عالبسكليت!

٣-الصلعان بينبت شعرهن بالعكس. لهيك، جارنا الأصلع مات بعمر صغير، تعبّى قلب راسو شعر واختنق.

٤-كان في عندي صوص صغير، دائماً يلحقني. مرّة ضحكت أمّي، وقالتلي: "يمكن مفكرك أبوه". معقول كون أبوه؟

٥-جيراننا كان عندهن تلفون، نحنا ما كان عنّا. رنتو العالية كانت توصل لبيتنا، كنت روح لعند البياع واتّصل فيهن وما ردّ، كنت أفرح وقت كانت توصل رنتو العالية لبيتنا.

٦-كانت جارتنا تلف شعرات بناتها باللفافات، المسا كل يوم جمعة، بوقت زيارتنا، كنا نزورهن المسا كل يوم جمعة. بظن أنها بتضل عم تلفلهن شعراتهن باللفافات طول الأسبوع بس ما بتخبرنا.

٧-ببيت رفيقة أمي، كان في غرفة مونة فاضية.

٨-الجنينة بينخلطوا فيها الأولاد. الأمهات بيتخربطوا وبياخدوا ولاد بعضهن بآخر النهار. بضل قاعد جنب أمّي مشان تتذكّرني. 

٩-أهلي كانُوا يختفوا وقت كنت روح عالمدرسة. ويرجعوا يظهروا وقت أرجع عالبيت. كانوا كمان يختفوا ويرجعوا يظهروا وقت كنت نام وفيق. أبي مرة اختفى، وما عاد قدر يظهر. 

١٠- المسدس جهاز تحكُّم، بيفجر الأجسام عن بعد.