سخرية من سؤال مذيع مصري لموريتاني: تعلمت العربية فين؟

الفيديو تم تداوله بشكل واسع على مواقع التواصل الاجتماعي، وجاء فيه سؤال مدحت شلبي: "بس أنا شايفك بتتكلم عربي كويس أنت أتعلمت عربي في مصر؟" ليرد الطالب الموريتاني خالد موسى: "لا أنا موريتاني ومولود في موريتانيا". ليقول شلبي "أمال اتعلمت عربي امتى؟". 
فيقول الطالب: "أنا موريتاني ومتعلم عربي من طفولتي". ليقول شلبي: "ايوة يعني مين علمك عربي؟" فيقول الطالب: "موريتانيا بلد عربي والله وكل الشعب بيتكلم عربي".

‎وتباينت ردود الأفعال على مواقع التواصل تجاه مدحت شلبي بين السخرية من جهله كونه إعلامياً، وبين تصحيح معلوماته، وإضافة أخرى، فكتب محمد سيدي: "‏‎#موريتانيا بلد المليون شاعر يا مدحت شلبي".

وأضاف أحمد فرماوي: "مش عايز أقولكم إن العيال الصغيرة، واللا حتى البياعين في الشارع في موريتانيا، خصوصا الشناقطة بيكونوا حافظين الألفية، والأجرومية وغيرها من المتون ده عادي جدا. يعني عندنا دكاترة في الجامعية والله ما يسمعوش عنها حاجة".

وفي محاولة لحسم الجدل كتب عبده الديك: " ‏للتذكرة فقط مدحت شلبي لوا، يعني ماستغربوش قوي من الجهل اللى هو فيه".

وشاركه الرأي تيمو تيمو: "مدحت شلبي وهو على مشارف السبعين عام ولواء سابق وإعلامي حالي، ولسه عارف من ساعتين بس إن جمهورية موريتانيا دولة عربية . وعلي رأي المثل هلا هلا على الفانلة".

وكتب محمد ماجد: "‏دة واحد من اللي بيطلعوا في التليفزيون عشان يشكلوا وعي عامة الشعب ! دة شلبوكة ياعم صباح الفل".

وعلقت نهر خالد: "‏المؤسف إن مدحت شلبي فاكر إن خالد موسى أكيد متعلم عربي في مصر، مع إني أعتقد إن مستوى اللغة العربية في موريتانيا أحسن بمراحل من مصر. جهل مشلتت".

وسخر ماهر أنور: "‏يا سلام بقى لو مدحت شلبي بعد ما عرف إن موريتانيا بلد عربي، يعرف إن الصومال وچيبوتي ومعاهم جزر القُمر بلاد عربية، ويعرف إنها قُمر مش قَمر".