الطماطم والبطاطس تلحقان بالدولار في مصر... هيعوموهم؟
الطماطم والبطاطس تلحقان بالدولار في مصر... هيعوموهم؟
(محمد الشاهد/فرانس برس)
بعد ارتفاع سعريهما، تحولت الطماطم والبطاطس إلى مادة رئيسية في تعليقات رواد مواقع التواصل الاجتماعي بمصر، وانتشرت السخرية من فشل الحكومة في مواجهة الأزمة.
ولم يقف وزير التموين علي مصيلحي مكتوف اليدين، فقرر التدخل بتصريح زاد من السخرية، حين قال: "مافيش حد بره في العالم بيطبخ بالطماطم".
وغرد الناشط مجدي كامل: "الأول يقولك اتغدى واتعشى بخمسة جنيه في اليوم.. وبعدين لما الطماطم بقت بـ 14 جنيه قالك مفيش حد بيطبخ بطماطم.. وكان ناقص يقولك البطاطس بره اسمها بوتيتو ومفيش حد بره بيعمل صينية بوتيتو".
ورد مكاوي على وزير التموين: "إيه رأيك بلاها طماطم طب بره في ديمقراطية وتداول سلطة وعدالة اجتماعية".
وطالبه صاحب حساب "بلتكانة": "طلعونا بره ينوبكم ثواب ومش عايزين منكم لا طماطم ولا بطاطس".
وكتب يوسف أحمد المعروف بـ "مسؤول شباك تويتر": "عيشونا زي برا طيب في نفس المستوى المادى ومش هنشتكي من الطماطم ولا البطاطس".
وأعلن علي حسن عن تخوفه: "أنا خايف يعوموا البطاطس والطماطم زي ما عوموا الجنيه".
وغرد أحمد: "مصر #مصطفي_النجار_فين #عبد_الخالق_فاروق_فين #أمال_ماهر_فين.. مصر أصبحت متاهة أو دوامة بتبلع مواطنيها! الفول الأكلة الشعبية سعره 20 جنيه ..البطاطس 14 جنيه .. وزير التموين بيقول بتوع بره ما بيطبخوش بطماطم .. يعني استغنوا عن الطماطم ..عمال يونيون اير معتصمين .. السيسي خلاها جنة".
وعلق الحسين عن تصريح الوزير: "المانشيتات دي ساعات بفتكرها أخبار هزار مش بجد".
وتقمص أحمد سعد شخصية السيسي وقال: "منعنا الرز.. بوظنا الطماطم.. غلينا الفاكهة والخضار واللحمة والسمك.. منعنا الفراخ الصاحية.. والنهاردة #البطاطس.. جوعناهم كده صح".
وكتب محمود: "الرز .. مش ضروري رز إيه.. يعني مناكلش رز وهنبني بلدنا ..السكر .. مش ضروري سكر إيه يعني مش هنشرب شاي وهنبني بلدنا .. اللحمة .. مش ضروري لحمة إيه يعني مناكلش لحمة وهنبني بلدنا .. وأخيرا الطماطم .. قالك مفيش حد بره مش عارف إيه .. إنتوا كده دمرتوا المنطق".
وسخر أبو بيتر: "اللمون يرخص الطماطم تغلى.. طبق السلطة مش عايز يكمل في أم البلد دي!".
