مصريون يدعمون تقشف السيسي بصناعة "المنظفات" منزلياً!

كتبت مروة محمد: "البنزين مش بالأهمية دي يعني إننا نزعل على غلاؤه اللي مشوار شغله قريب يمشي على رجليه ويوقف عربيته والله في ناس جايبه العربيات للمنظره وفي ناس جايباها مشغلاها للمخصوص وبتاجر بيها وفيها إيه لما تجيب موتوسيكل أو عجلة تروح بيهم شغلك ولمشاويرك.. إركب أوتوبيس وعيش عيشة باقي الناس".

وشاركتها دعاء طارق باقتراحات منزلية: "يا مصريين الحل في إيدينا نعيش عيشة أهلنا شوية أنا قرّرت كده مع نفسي إن محدش يضحك عليا في الأسعار عملت ديتول وداوني وبريل وآريال أتوماتيك في البيت بقالي كام شهر الحاجة اللي كنت بشتريها ب 2000 بقيت أصنعها في البيت ب 400 جنيه بس، رشدت استهلاك الكهرباء والماء والغاز".

التغريدتان جعلت صاحبتيهما في مرمى نيران رواد مواقع التواصل الاجتماعي:

كتبت ريم: "إزاي يعني البنزين مش بالأهمية إننا نزعل عليه؟ هو البنزين لما أعوز أسافر أتفسح أو أروح الشغل بس؟ لا البنزين لنقل السلع من بلد لبلد تانية يعني لما البنزين يغلى يبقى السلع هتغلى وقيسي على كده بقى كل السلع، بطلو النظرة السطحية دي بقى".

وكتبت مقدمة الطبخ الشهيرة سلمى: "عملت ديتول وداوني وإيريال في البيت؟؟ طيب ماعرفتيش تصنعي البنزين؟ ده سهل خالص يا ماما هتستعبطي".

وغرد مصطفى مستفسراً: "حد يسأل لنا الأخت اللي بتصنع ديتول وآريال وصابون في البيت عن طريقة تصنيع البنزين والمواصلات العامة والأدوية وكروت الشحن".

واستكمل لا منتمي: "وممكن نعمل مدرسة في البيت وجامعة في البيت ومستشفى ونصنع مكرونة ونزرع خضار وفاكهة ونلم حطب نطبخ بيه كل حاجة ممكن نعملها في البيت ونوفر".

وشرح عمرو فساد التفكير: "طيب، المصانع دي هتخسر، الضرائب "مصدر الدخل الأساسي والأكبر للدولة" هتقل جداً، العمالة "مهندسين ومحاسبين وعمالة تصنيع وأمن وسواقين" يقعدوا في البيت فالبطالة تزيد، العمالة دي كانت بتشتري أكل ولبس و.. ف الناس دي دخلهم هيقل برضه فمصانع جديدة تقفل والضرائب تقل وارجع لأول التويت".

وبشكل فني كتبت سلوى عمر: "بغض النظر عن منظفات بـ 2000 جنيه دا غسيل أموال كده في تصنيع الحاجات دي في البيت * من غير التعديلات الكيميائية للمصانع، ممكن يضرك إنتي واللي عايشين معاكي بسبب تأثيرات المواد كمان أسعار الماتريال النضيفه أغلى بكتير من مواد تحت بير السلم إلى كلفتك 400 جنيه".

وسخرت نكسجية: "الهانم وفرت 1600 جنيه من عمايل المنظفات في البيت طب ده مرتب موظف عنده عيلين بياكلوا ويشربوا ويلبسوا وبتعالجو وبلاش بيتعلموا علشان اللي اتعلموا لما كبروا بقو بينظروا ع الناس بعمل المنظفات في البيت وميعرفوش إن الراجل ده آخره صابونة بريحة وعلبه مسحوق غسيل يدوي وكيس بوتاس".