تسريب الاستخبارات بمصر: إطاحة وشيكة بعزمي مجاهد من "العاصمة"

بثت قناة "مكملين" الفضائية، مساء الأربعاء، تسريباً مسجلاً بين الضابط بجهاز الاستخبارات الحربية المصري، أشرف الخولي، وضابط في جهاز الأمن الوطني يدعى إمام (يحمل رتبة مقدم)، بوصفه مسؤولاً أمنياً عن قناة "العاصمة" الفضائية بمدينة الإنتاج الإعلامي، للحديث عن إمكانية الإطاحة بالإعلامي عزمي مجاهد من القناة المملوكة للاستخبارات.

وقال إمام في المحادثة: "عشان حضرتك تبقى عارف الدنيا، القناة طالعة بسياسة معينة جديدة، وأنا هابقى موجود. السياسة العامة اللي إحنا حاطينها اللي هي خاصة بتوجيهات الدولة، طبعاً أنا ماينفعش أتكلم الكلام ده، زي ما هو متبع، وحضرتك عارف. لكن الناس كلها شغالة بالتعليمات دي، وكابتن عزمي مجاهد كل يوم بيشوفني، وماكلمنيش يا أشرف بيه، هو كلمك؟".

فقال الخولي: "كلمني شخصياً كذا مرة، لما قرفنا يعني. فقلت أتكلم مع وليد حسني (رئيس قناة العاصمة)"، ليرد إمام "الراجل ده بتاعنا زي ما هو معروف، فإحنا بنتكلم في إيه. أنا معايا حد تاني آهو موجود، وهو جاي من فالكون موجود الـ 24 ساعة في القناة. عشان سياساتها، وتوجهاتها ماشية إزاي، والغلطة بفورة".

وتابع إمام: "أنا بس زي ما فهمت من الأستاذ وليد، لغاية الست شهور دول، ونخلص انتخابات الرئاسة، بعد كده يصفوا حساباتهم مع بعض بعيد عننا. نظبط الدنيا إحنا، عندنا خريطة دلوقتي بالتوجيهات بتاعتنا. مش هاينفع أتكلم فيها، بس لازم تمشي بالطريقة اللي هو بيقول عليها. وعزمي مجاهد حبيبي برضوا، بس المفروض تقوله عندك حد اسمه المقدم إمام. روح اتكلم معاه، وشوف الدنيا ماشية إزاي".

وأجاب الخولي "بس هو مكانش هايكلمني يا سيادة المقدم"، ليقول إمام "أنا عندي سياسة، وخريطة خاصة، اللي بيعملها رئيس القناة، بالتوجيهات اللي جاية له. وده يتقال إزاي، وده يتعمل إزاي، وده يبقى فين. نشتغل على كده، هو إحنا استغنينا عن عزمي مجاهد. ما إحنا بنقول ممكن ما يكونش موجود".

وزاد إمام في حديثه: "إحنا عاوزين الجديد اللي يأثر في الناس، يعني ممكن الساعة بتاعته دي، تفرق معايا في نسبة مشاهدة. لو عشرين واحد بيتفرجوا، يبقى ألف واحد بيتفرجوا عليه. فوصلت الرسالة بتاعتي، غير كده لا"، فقال الخولي "أنا معاك جداً في الكلام اللي قلته ده. بس أنا بقولك بس بعيداً عن وليد، أنا عايزك تروق الجو في القناة، وتريح عزمي لغاية بس ما نعدي الحتة دي (انتخابات الرئاسة)".

وأضاف الخولي: "أنا هاقفل معاك، وهاكلم عزمي عشان يكلمك النهارده. هو طالع مش كده؟"، ليقول إمام "قوله إن في حد زميلي اسمه المقدم إمام روحله، واقعد معاه في مكتبه. مالكش دعوة بحد، وأنا هاظبط القصة دي، وهافهمه التوجيهات نازلة إيه. عشان يفهم أصل اللي بيحصل، أصل ده مش اتحاد الكورة يعني. أنت فاهمني".

وقال الخولي: "إحنا القيادة العليا كلامها واضح، مش وقت أخطاء خالص"، ليقول إمام "يا أشرف بيه، أنا قاعد دلوقتي موجود ليه في مدينة الإنتاج الإعلامي. الكلمة اللي بتتقال بحساب، الخريطة اللي تتحط هي خريطة وليد حسني. حاطط خريطة معروضة على الإدارة، وعلى القيادة، بتقول واحد اتنين تلاتة أربعة. اتوافق عليها الخريطة، كله ينفذ".

وأضاف: "يا أشرف بيه، أنا موجود 24 ساعة في المدينة (الإنتاج الإعلامي)"، ليقول الخولي "أنا بس ليا طلب خاص من حضرتك، إن الموضوع يخف في القناة خالص. مش عاوزين يحس بمشاكل مع تامر، لأن هو (عزمي مجاهد) شايل من تامر، وشايل من وليد. وحاسس إن وليد ميال لتامر"، ليختتم إمام، بقوله "بيني وبينك يا أشرف بيه، المفروض عزمي مجاهد ده ما يكونش موجود دلوقتي".